wo jo shikwe kar rahe the talkhi-e-haalat ke
aa gae zad mein sabhi be-mausami barsat ke

pahle pahle main kisi bhi baat par rota na tha
phir meri aankhon mein kheme lag gae sadat ke

kholi jab us khub-ru ne bazm mein apni zaban
phul khilne lag gae har samt mauzuat ke

us se badh kar kaun kar sakta hai zeb-e-dastan
jis ne sau matlab nikale hain tumhaari baat ke

istikhare mein jab aaya hai ki donon ek hon
phir masail kis liye hain maslakon ke zat ke

kah raha hai aaj bhi aashur ki shab ka charagh
bujh rahe hain din ke andhere mein suraj raat ke