wo kahan mujh pe jafa karta tha
jo muqaddar tha mila karta tha

aaj sharmata hai suraj us se
wo jo taron se haya karta tha

sochta hun to hansi aati hai
samne us ke main kya karta tha

main pada rahta tha uftadgi se
jada-e-shauq chala karta tha

yaad aaya hai ki khush-bashi ko
gham ka afshurda piya karta tha

gard-e-rah ban ke jo yun baitha hun
surat-e-shoala utha karta tha

dil se ek huk bhi ab uthti nahin
dil ki hangama bapa karta tha

manzilon tak hai kadi dhup khadi
main bhi sae mein chala karta tha

ab wo marne ki udate hain khabar
jin pe marne ko jiya karta tha

wo bhi milte the kabhi mujh se 'nazar'
kabhi aisa bhi hua karta tha