wo khud apna daman badhane lage
chalo aaj aansu thikane lage

hamara bura waqt jab tal gaya
phir ahbab milne-milane lage

teri barhami mein bhi jaan-e-wafa
nawazish ke andaz aane lage

madawa-e-gham kuchh to karna hi tha
musibat padi gungunane lage

maza de gaya yar daur-e-firaq
hamein to ye din bhi suhane lage

mohabbat se taufiq-e-izhaar tak
pahunchte pahunchte zamane lage

ye ghunche bhi 'faruq' kya khub hain
khuli aankh aur muskurane lage