wo khud apne se jab mila hoga
do ghadi ko to kho gaya hoga

log milte hain be-gharaz ab bhi
koi afsana sun liya hoga

kis tawaqqo pe intizar karen
tha wo jhonka guzar gaya hoga

kya mila raat bhar bhatakne se
chand khud bhi ye sochta hoga

koi khushbu jagaegi phir se
phir naya koi silsila hoga

mujh ko jis par guman hua us ka
hai yaqin koi dusra hoga

'zahra' jo dekhun sochti hun wahi
sochna chhod dun to kya hoga