wo mahtab bhi khushbu se bhar gaya hoga
jo chandni ne teri zulf ko chhua hoga

tere labon se jo nikla tha ek tabassum sa
mere liye to wahi git ban gaya hoga

likha hai aaj tera nam main ne kaghaz par
ye mera lafz bhi itra ke chal raha hoga

meri palak pe hai ehsas jaise makhmal sa
tumhaara khwab use chhu ke chal diya hoga

mujhe yaqin hai tere hi surkh galon ne
dhanak ko shokh sa ye rang de diya hoga

jo dekhta hai tera husn roz chhup chhup kar
us aaine ko bhi to ishq ho gaya hoga