wo muskuraen asiran-e-rang-o-bu ke liye
shuur chahiye phulon ko aarzu ke liye

shahid-e-khanda-e-gul ai asir-e-jalwa-e-mah
nazar ko garmi-e-dil chahiye numu ke liye

ye kya kaha sar-e-mahfil nigah-e-qatil ne
machal rahi hai har ek shai mere lahu ke liye

utha ke sahn-e-chaman mein naqab-e-lala-o-gul
maze bahaarne tashhir-e-rang-o-bu ke liye

faqat nazar ko charagh-e-rah-e-talab na samajh
zarur gumshudagi bhi hai justuju ke liye

jabin-e-subh pe raushan charagh-e-tur nahin
wo aa gae hain sar-e-baam guftugu ke liye

ghurur-e-chaak-e-junun 'faiz' sar-nigun na hua
hazar khar-e-mughilan badhe rafu ke liye