wo nahin hun main ki jis par koi ashk-bar hota
kabhi shama bhi na roti jo mera mazar hota

shab-e-gham mein zindagi ka kise e'tibar hota
meri jaan ja chuki thi jo na intizar hota

meri dastan-e-gham ko wo ghalat samajh rahe hain
kuchh unhin ki baat banti agar e'tibar hota

yahi soz-e-ishq jis ko main hamesha raaz samjha
jo hijab-e-dil na jalta to na aashkar hota

main shikayat zamana jo karun to kya samajh kar
na ye daur-e-charkh hota na ye rozgar hota

dil-e-para-para tujh ko koi yun to dafn karta
wo jidhar nigah karte udhar ek mazar hota

mai-e-ishq josh-zan hai ye lahu nahin ragon mein
mera nashsha kyun utarta mujhe kyun khumar hota

mere dil ne badh ke roka tere tir-e-jaan-fishan ko
jo ye beach mein na padta to jigar ke par hota

wo lahad pe un ka aana wo qadam qadam pe mahshar
meri nind kyun uchatti agar ek bar hota

shab-e-hijr baad mere agar is jahan mein rahti
to yahi siyah daftar mera yaadgar hota

jo hamare dekhne ko kabhi aap aa nikalte
wahi aankh dar pe hoti wahi intizar hota

wo shabab ke fasane jo main sun raha hun dil se
agar aur koi kahta to na e'tibar hota

ye zamana badh raha hai faqat iztirab-e-dil se
shab-e-gham na yun thaharti jo mujhe qarar hota

wo jahan mein aag lagti ki bujhae se na bujhti
mere dud-e-dil mein 'saqib' jo koi sharar hota