wo to mera apna tha
jis ne mujh ko luta tha

maut pe meri rota tha
mera qatil bhola tha

sab jag suna suna tha
jab main tujh se bichhda tha

dhund si chhai thi har-su
kal ka suraj kaisa tha

koi birhan gati thi
dard bhara ek naghma tha

darta darta sa mujh se
mera apna saya tha

main barfani raaton mein
hijr ki aag mein jalta tha

rah-e-wafa mein pair na rakh
ek diwana kahta tha

insanon ke jangal mein
'arif' bilkul tanha tha