wo to shukr karo tum mitha lahja hai shahzadi ka
jis ko pyar samajhte ho wo ghussa hai shahzadi ka

main ne sari duniya mein bas ek hasina dekhi hai
baqi koi husn nahin hai charba hai shahzadi ka

dekhne wale soch rahe hain mere munh mein cigarette hai
main kahne mein sharmata hun bosa hai shahzadi ka

jab main us ka hun to puchhte kyun ho ye dil kis ka hai
naukar bhi us ke honge jab bangla hai shahzadi ka