wo tund-khu hi sahi mauja-e-khizan ki tarah
dikhai deta to hai abr-e-mehrban ki tarah

tamam-raat sulagta raha zamin ka badan
sahar khuli to kisi jalte baadban ki tarah

teri talash mein ab bhi khula ke aangan mein
rawan hai chand kisi barg-e-nim-jaan ki tarah

main jal raha tha sulagte safed sahra mein
gale mila wo mujhe mauja-e-rawan ki tarah

chalin wo tund hawaen ki tar tar hua
wo sabz ped ki lagta tha saeban ki tarah

kahan ye chhod gaya qafila khayalon ka
ruka pada hun kisi naqsh-e-be-nishan ki tarah

baras rahe hain falak se zamin par jugnu
faza udas hai shafqat lute makan ki tarah