yahi maqam-e-wafa hai to koi baat nahin
ye dil yahin pe luta hai to koi baat nahin

hamare daur-e-mohabbat ka raaz-e-sar-basta
kisi se tum ne suna hai to koi baat nahin

bade saliqe se mazmun band hai is mein
lifafa dil ka khula hai to koi baat nahin

mere khilaf falak-bos sazishon ka dhuan
tumhaare ghar se utha hai to koi baat nahin

khuda kare ki tere ghar ki aag bujh jae
'asar' ka hath jala hai to koi baat nahin