yahi nahin ki mera dil hi mere bas mein na tha
jo tu mila to mein khud apni dastaras mein na tha

ba-nam-e-ahd-e-rifaqat bhi ham-qadam na hua
ye hausla mere masum ham-nafas mein na tha

ajib sehr ka aalam tha us ki qurbat mein
wo mere pas tha aur meri dastaras mein na tha

na jaane qafila-e-ahl-e-dil pe kya guzri
ye iztirab kabhi nala-e-jaras mein na tha

khabar to hogi tujhe tere jaan-nisaron mein
koi to tha sar-e-maqtal jo pesh-o-pas mein na tha

'surur' apne chaman ki faza hai kya kahiye
sukut ka to wo aalam hai jo qafas mein na tha