yahi suluk munasib hai khush-gumanon se
patak raha hun main sar aaj-kal chatanon se

hawa ke rahm-o-karam par hai barg-e-awara
zamin se koi rishta na aasmanon se

main ek raqib ki surat hun darmiyan mein magar
zamin ki god hari hai inhi kisanon se

wo dur ufuq mein udanen hain kuchh parindon ki
utar rahe hain nae lafz aasmanon se

har ek zaban daricha hai khana-e-jaan ka
so mujh ko pyar hai duniya ki sab zabanon se