yaqinan hum ko ghar achchhe lage the
makin pahle magar achchhe lage the

use rukhsat kiya aur us se pahle
yahi diwar-o-dar achchhe lage the

wo dariya hijr ka tha tund dariya
udasi ke bhanwar achchhe lage the

hamare hath mein patthar ka aana
darakhton par samar achchhe lage the

saubat to safar mein lazmi thi
magar kuchh ham-safar achchhe lage the

wo chehre jin pe raushan thi sadaqat
lahu mein tar-ba-tar achchhe lage the