yar jab ham-kanar howega
dil ko mere qarar howega

guzra mujh khak se jo daman-kash
ye wahi shahsawar howega

tab kya mah-e-chaar-dah ko jo tuk
us pari se do-chaar howega

mehr us rukh ke aage afsurda
jun charagh-e-mazar howega

gul nazakat ke aage us ru ke
chashm-e-bulbul mein khar howega

sarw is qadd-e-rast ke aage
banda-e-chobdar howega

garche aalam mein har koi tera
aashiq-e-gham-gusar howega

yaad kar hum sa par na kui pyare
fidwi-e-jaan-nisar howega

ai 'jahandar' kab wo aaina-ru
dekho mujh se do-chaar howega