yas kya kya na gul khilati hai
aas bandhti hai tut jati hai

yaad aati hai bhul jata hun
bhul jata hun yaad aati hai

bach ke tufan se aa gai kashti
ab kinare pe dagmagati hai

sona chahun to nind ud jae
jagta hun to nind aati hai

sham-e-gham chashm nam hai dil muztar
sham-e-ummid jhilmilati hai

subh hoti nahin masarrat ki
sham-e-gham roz aati jati hai

kya 'girami' khila hai ghuncha-e-dil
kyon faza aaj gungunati hai