ye badalte hue manzar nahin dekhe jate
dast-e-ahbab mein khanjar nahin dekhe jate

dekhe jate hain faqat fath-e-mubin ke sapne
jang mein katte hue sar nahin dekhe jate

ye mohabbat hai kisi se bhi ye ho sakti hai
is mein tang-dast-o-tawangar nahin dekhe jate

apne mitti ke diyon par hi qanaat kar lo
roz suraj ke ye tewar nahin dekhe jate

aap ka ghar hai ye aankhen to inhin mein rahiye
aap in aankhon se bahar nahin dekhe jate