ye chehra hai gul hai ye gulshan hai kya hai
sawera hai shabnam hai darpan hai kya hai

chali hai ye khushbu tere gesuon se
teri yaad hai tera daman hai kya hai

kiran husn ki chhan ke aane lagi hai
ye parda hai aanchal hai chilman hai kya hai

nazar jhuk rahi hai khamoshi hai lab par
haya hai ada hai ki an-ban hai kya hai

ye sharm aur tabassum ye aankhon mein kajal
ada hai kali hai ki bachpan hai kya hai

akele mein ye phutti naghmagi si
ye aahat hai koyal hai dhadkan hai kya hai

nami hai fazaon mein 'kausar' ji kahiye
ye gesu hai baadal hai sawan hai kya hai