ye daur-e-masarrat ye tewar tumhaare
ubharne se pahle na duben sitare

bhanwar se lado tund lahron se uljho
kahan tak chaloge kinare kinare

ajab chiz hai ye mohabbat ki bazi
jo haare wo jite jo jite wo haare

siyah naginen ban ke dasti hain kirnen
kahan koi ye roz-e-raushan guzare

safine wahan dub kar hi rahe hain
jahan hausle na-khudaon ne haare

kai inqilabaat aae jahan mein
magar aaj tak din na badle hamare

'raza' sail-e-nau ki khabar de rahe hain
ufuq ko ye chhute hue tez dhaare