ye dil bhi zakhm hai wo gul bhi ghaw rakhta hai
tamam shahr talab ka tanaw rakhta hai

shikasta shakh ho tum barishon ko do na sada
nasheb ab ke ghazab ka bahaw rakhta hai

qarib hai to qarib aae dur hai to rahe
ye kya ki pas bhi hai aur khichaw rakhta hai

wo mo'atabar bhi hamein kar gaya sipurd-e-hawa
ye mehrban bhi maujon ki naw rakhta hai

dikha ke khwab mujhe nind se jagata hai
mujhe bigad ke apna banaw rakhta hai

'ata' se baat karo chandni si shabnam si
khunuk nazar hai magar dil alaw rakhta hai