ye ghar ke bhed hain kahun kaise zaban se
kya dukh mile hain mujh ko mere bhai-jaan se

cafe ke ek kone mein masruf guftugu
maghmum be-hayat badan be-zaban se

ye din jo aaj bit gaya phir na aaega
ye tir bhi nikal gaya qaus-e-kaman se

achchhe bashar hain jin ko nahin dhundne ki dhun
achchha khuda hai dur hai wabastgan se

ulte kunen ke qutr mein latka diye gae
utre the do farishte kabhi aasman se