ye haqiqat majaz hai phir bhi
jaane kyon dil-gudaz hai phir bhi

waqt ke hath mat khai hai
aql par apni naz hai phir bhi

raat din jhut lut makr-o-fareb
panj-waqta namaz hai phir bhi

chhed karta hai mah-jabinon se
aadmi pak-baz hai phir bhi

hum faqat do qadam samajhte hain
garche manzil daraaz hai phir bhi

go nahin koi mail-e-tauba
dar-e-tauba to baz hai phir bhi

kaam 'azad' kyon nahin bante
wo bada kar-saz hai phir bhi