ye iztirab dekhna ye intishaar dekhna
sahar na ho kahin zara pas-e-ghubar dekhna

ye khastagi ka faiz hai ki jis ne aankh mund kar
sikha diya mujhe badan ke aar-par dekhna

shikast kha chuke hain hum magar aziz fateho
hamare qad se kam na ho faraaz-e-dar dekhna

guzar gai jo mauj us ki yaad hi fuzul hai
magar ho us ka mud ke mujh ko bar bar dekhna

mera khulus dekhna ki mahw-e-intizar hun
use bhala chuka hun kaif-e-intizar dekhna