ye jaur-e-dast-e-zamana kaha kaha na kaha
ki dil ka haal kabhi aap ne suna na kaha

jo baat tum se thi kahni faqat tumhi se kahi
har ek bazm mein ye dil ka majra na kaha

ye log rai ka parbat bana rahe yunhi
tere rawayye ko hum ne to narawa na kaha

khuda ka shukr sitam nagawar bhi na lage
khuda ka shukr kabhi tum ko bewafa na kaha

use nahin hai shikayat to dusri koi
use gila hai ki kyon hasil-e-dua na kaha

khalish si zehn mein le kar hamesha phirta raha
sitam ko jab bhi bura main ne barmala na kaha

'wali' gharibi mein kam to nahin hai ye eazaz
zamin ke bande bashar ko kabhi khuda na kaha