ye jo parda hai kisi roz uthaya jae
kaun hun main ye zamane ko bataya jae

aarzu ye hai ki diwana kaha jae mujhe
nam le kar na mera mujh ko bulaya jae

jumbish-e-chashm se naghma hui jati hai faza
kya qayamat ho labon ko jo hilaya jae

wo meri fikr ki banhon mein nahin aa sakta
sochta hun use sine se lagaya jae

jis ka mabud hai chadhta hua suraj 'bedi'
us ko ehsas andhere ka dilaya jae