ye jo talab hai dariya tha kabhi
main yahan baith ke rota tha kabhi

tirgi ne wahan dekha hai mujhe
raushni ne jahan socha tha kabhi

apni tafhim ka zindani lafz
shakh-e-mani pe chahakta tha kabhi

ab chara-gah hai tabiron ki
mere khwabon ka jazira tha kabhi

yaad padta hai teri fursat mein
main kisi kaam se aaya tha kabhi

aaj roti hai jo mere upar
main isi baat pe hansta tha kabhi

ab to nazren bhi chura leta hai
jo mujhe khwab dikhata tha kabhi

apni wusat ko nikalta ye hujum
meri tanhai se uljha tha kabhi

ye jo andar ka tamashai hai
mere bahar ka tamasha tha kabhi