ye jo thahraw hai rawani mein
ek katha aur hai kahani mein

hae afsos hae hae dil
kat gai umr raigani mein

kanch pyala tha kirchi kirchi hua
aa gaya jab ubaal pani mein

dasht mein ja ke khud-kushi kar li
na laga dil jo baghbani mein

maut yak-lakht aa bhi sakti hai
kab hai takhir na-gahani mein

masala hal kisi tarah bhi ho
aag lag bhi chuki hai pani mein

dil hai khali makan sa 'adil'
dost bin kya hai zindagani mein