ye karobar-e-faraghat tamam karne ko
main subh ghar se nikalta hun sham karne ko

main us ki aankh mein wapas wo khwab chhod aaya
jo us ne bheja tha ninden haram karne ko

ye aur baat ki mujh ko na tu samajh paya
tadap raha hai zamana imam karne ko

jahan mein koi mayassar nahin to kya gham hai
sukut-e-lala-o-gul hai kalam karne ko

kali ko phul bana kar guzar gai hai bahaar
thahar gaya hai ye nam ehtiram karne ko

abhi to shakh ke andar nihan hai angdai
machal utha hai ye gulshan salam karne ko

ghazal bhul gae apni chaukdi 'tahir'
ye kaun dasht mein utra khiram karne ko