ye kis ke aane ke imkan dikhai dete hain
dil o nigah ghazal-khwan dikhai dete hain

wo ahl-e-dil jo tere aasre pe jite the
rahin-e-gardish-e-dauran dikhai dete hain

hamein to aaj bhi gham-ha-e-do-jahan hain aziz
wo aur hain jo gurezan dikhai dete hain

ek aag phir bhadak utthi hai dida o dil mein
kuchh ashk phir sar-e-mizhgan dikhai dete hain

ye kis ke jalwa-e-rangin ka aks hai 'shahzad'
dil o nigah firozan dikhai dete hain