ye kis ke husn ki jalwagari hai
jahan tak dekhta hun raushni hai

agar hote nahin hassas patthar
teri aankhon mein ye kaisi nami hai

yaqin uth jae apne dast-o-pa se
usi ka nam logo khud-kushi hai

agar lamhon ki qimat jaan jaen
har ek lamhe mein poshida sadi hai

tujhe bhi munh ke bal girna padega
abhi to sar se topi hi giri hai

talluq tujh se rakh kar itna samjhe
hamari sanp se bhi dosti hai