ye kya waswase ham-safar ho gae hain
sabhi raste pur-khatar ho gae hain

pukara nahin tum ko ghairat ne warna
kai bar aakar idhar ho gae hain

na samjho hamein kuchh shikayat nahin hai
ki khamosh kuchh soch kar ho gae hain

kise ho khabar dard-e-pinhan ki ai dil
jinhen thi khabar be-khabar ho gae hain

hum apni tabahi pe bas muskurae
magar daman-e-ghair tar ho gae hain

tere bin hamein maut bhi to na aai
judai ke din bhi basar ho gae hain