ye log dhund rahe hain yahan wahan mujh ko
talash karte nahin apne darmiyan mujh ko

main agle pichhle zamanon se ho ke aaya hun
kahin nazar nahin aae hain raftagan mujh ko

wo jis mein laut ke aati thi ek shahzadi
abhi talak nahin bhuli wo dastan mujh ko

ye kis ne kar diya saiqal zamin ka aaina
tah-e-zamin nazar aata hai aasman mujh ko

ajib shakhs hai jis ne kahin nahin jaana
ye kah ke dekhta jata hai karwan mujh ko

mujhe khabar hai kahani ka ant aa gaya hai
mujhe khabar hai ki hona hai raegan mujh ko