ye main ne mana kuchh us ne kaha hai lekin kya
hamara haal sab us ko pata hai lekin kya

meri salib to rakhwa do mere kandhon par
qatar lambi hai waqfa bada hai lekin kya

rahi na panw mein jumbish na aankh mein ummid
hamare samne rasta pada hai lekin kya

har ek shakhs muqaffal makan ke manind
nagar mein kuchh to yaqinan hua hai lekin kya

koi batao kahan dusra qadam rakhun
dayar-e-zist bahut hi bada hai lekin kya

utha ke le gain 'abid' ko maujen sahil se
koi safina use dhundhta hai lekin kya