ye mere dil ki wusat hai kahan tak
zamin se le ke hadd-e-asman tak

tumhaara husn hai kaun-o-makan tak
kali se gul se har ek gulistan tak

teri ulfat ne mujh ko kya banaya
ata ki hai hayat-e-jawedan tak

kidhar pe barq sargardan phiri hai
pahunch pai na mere aashiyan tak

sunae dastan ghairon ki aksar
na aai apni hi haalat zaban tak

tere jaisa na koi dekh paya
nigah-e-shauq phir aati jahan tak

pareshan ho ke aalam-e-jahan se
hum aae aaj tere aastan tak

'nasim' aisa mera haal-e-junun hai
hai is ka silsila sud-o-ziyan tak