ye meri aahon mein aanch kaisi ye taw kaisa
dahak raha hai ye mere andar alaw kaisa

ye aag kaisi dil-e-hazin mein lagi hui hai
ye aansuon ka hai jaanib-e-dil bahaw kaisa

ye kaun hum ko falak se paiham bula raha hai
hai is jahan mein ye roz ka chal-chalaw kaisa

mohabbaton mein rawa nahin hai ye waza-dari
bane ho aashiq to ishq mein rakh-rakhaw kaisa

jab ashk aankhon ki had ke andar hi maujzan hain
to phir ye aankhon ke sahilon mein kataw kaisa

koi to hai jo mujhe thaharne ko kah gaya hai
safar mein 'tasir' warna aisa padaw kaisa