ye pairahan pe pairahan wabaal hai
so khud ko be-wabaal kar visal kar

wajud-e-jism-e-jaan se istifada kar
zara samay nikal kar visal kar

lahu ko chulluon mein le ke yun uda
badan pe rang dal kar visal kar

amir-e-wahshiyan-e-ishq hun so tu
zara si dekh-bhaal kar visal kar

ye ism-e-karsaz hai junun padh
ye hosh paemal kar visal kar

teri ye zard aankhen dekh sharm kar
tu in ka rang lal kar visal kar

khuda jawab de na de bigad pade
khuda se bhi sawal kar visal kar

visal-e-yar gar haram hai to sun
haram ko halal kar visal kar

khuda ka hijr asl mein visal hai
so is mein intiqal kar visal kar

firaq se gurez kar gurez kar
visal kar visal kar visal kar