ye rah-rawan-e-shauq jo diwar ke sae mein hain sach puchhiye to ek nae aazar ke sae mein hain jis ko bhi dekho bas idhar qimat lagane aa gaya lagta hai jaise hum kisi bazar ke sae mein hain apnon mein rahte the to hum bhi kis qadar gumnam the mashhur hain jis waqt se aghyar ke sae mein hain hum ko bhala dariya teri tughyaniyon se khauf kya apni to sari kashtiyan patwar ke sae mein hain wo kitne danish-mand hain un par hamein bhi rashk hai jo log apne dushman-e-hushiyar ke sae mein hain raushan hain kitne raste iqan ke iqrar ke kya log hain jo aaj tak inkar ke sae mein hain un ke numu ki fikr bhi aakhir hamein kaise na ho apne sabhi paude ghane ashjar ke sae mein hain ab to ghanimon se hamein kuchh dar nahin lagta kabhi hum ek zamane se yahan talwar ke sae mein hain