ye sach hai har jagah tum jalwa-gar ho
wo dekhe jis ki aankhen hon nazar ho

adawat mein adawat ki ho tasir
mohabbat mein mohabbat ka asar ho

maza jab hai ki hamdam rang lae
lahu dil ka ho ya khun-e-jigar ho

wo arz-e-wasl par us but ka kahna
khuda ka wasta kyon mere sar ho

wo chahe un butan-e-sang-dil ko
ilahi jis ka patthar ka jigar ho

nahin din-sin tumhaare wo ki 'mahmud'
tumhaari umr ghaflat mein basar ho