zahir fareb nargis-e-mastana ho gaya
kuchh hoshiyar ab dil-e-diwana ho gaya

aansu bhare hain aankh mein us mast-e-husn ki
labrez kis ki umr ka paimana ho gaya

izhaar-e-arz-e-wasl ye baaten nahin wahan
ek harf-e-muddaa unhen afsana ho gaya

pahle kahan tha us dil-e-betab ka ye haal
kambakht us ko dekh ke diwana ho gaya

hamdam sharik koi bure waqt ka nahin
jab dil sa dost ishq mein begana ho gaya

ishq-e-butan mein khana-e-dil ka raha ye haal
kaba bana kabhi kabhi but-khana ho gaya

har mai-parast jama-e-ke-khusrawi mein tha
labrez jab sharab se paimana ho gaya

ki main ne arz-e-wasl to bole raqib se
kya hoshiyar shakhs tha diwana ho gaya

'mahmud' hai buton se wafa ki tujhe umid
patthar samajh pe pad gae diwana ho gaya