ye sach hai wafa us ne wada kiya
tamasha magar kuchh ziyaada kiya

saliqe se rakkha har ek chiz ko
yun kamre ko apne kushada kiya

kade kos pag pag jhulasti zamin
ye rasta bhi tai pa-piyaada kiya

yun hi apne ghar se nikal aae hain
safar aaj phir be-irada kiya

har ek baat dil manta hai meri
koi yar to sidha-sada kiya

taraf-dar 'ghaalib' ke hum bhi rahe
magar 'mir' se istifada kiya

libas apna 'faruq' khush-rang tha
magar dhup ne us ko sada kiya