ye sham-e-gham guzar mere sath-sath chal
ai panchhiyon ki dar mere sath-sath chal

tanha safar tawil hai main ub jaunga
ai sar-phiri bayar mere sath-sath chal

suraj ke aas-pas basaenge ek nagar
in baadalon ke par mere sath-sath chal

is zindagi ki dhup mein kar shukr jo milen
kuchh ped saya-dar mere sath-sath chal

phir us ki or jaise main khinchta chala gaya
gunji thi ek pukar mere sath-sath chal

hai rah-e-ishq ku-ba-ku mushkil bhi sakht bhi
tu chal sake to yar mere sath-sath chal