ye silsila-e-shokhi-e-jaanana naya hai
irshad hua hai ki ye diwana naya hai

matlab to hai is se ki hai mai kitni purani
is se hamein kya kaam ki paimana naya hai

aaina-e-tajdid hai tarikh-e-mohabbat
jis daur mein bhi suniye ye afsana naya hai

kis dhoke mein ho tum use kyon chhed rahe ho
zanjir purani sahi diwana naya hai

aata hai bahut der mein laghzish ka saliqa
saqi se abhi shaikh ka yarana naya hai

ai shama teri sozish-e-derina ki ho khair
kuchh aaj mazaq-e-gham-e-parwana naya hai

ek umr ke baad ab hua andaza-e-wahshat
jab us ne kaha mera ye diwana naya hai

ye dekh kar rindan-e-kuhan baithe hue hain
gham kya hai jo saqi tera mai-khana naya hai

ab dil ki jagah phul chadhate hain buton par
is daur mein dastur-e-sanam-khana naya hai

daman-e-tabassum mein hua jazb har aansu
ab aalam-e-lutf-e-gham-e-jaanana naya hai

karte hain salam aur bade andaz se 'jauhar'
yaron ka mere tarz-e-harifana naya hai