ye soch kar na phir kabhi tujh ko pukara dost
dushman ka dost ho nahin sakta hamara dost

hum ne kabhi rakha hi nahin hai hisab-e-ishq
tu hi hamara nafa hai tu hi khasara dost

aankhon ka ek hujum laga hai magar ye dil
bhula na aaj tak tera pahla ishaara dost

sab ko hai apni apni gharaz se gharaz yahan
koi hamara dost na koi tumhaara dost

jo kuchh azal se hota raha hai wahi hua
hum ko bhi doston ki adawat ne mara dost

chahe tu e'tiraf kare ya nahin kare
'ruhi' baghair hai nahin tera guzara dost