ye to socha hi nahin us ko juda karte hue
chun liya hai gham bhi khushiyon ko riha karte hue

jin charaghon par bharosa tha unhon ne aakhirash
sazishen kar lin hawaon se dagha karte hue

aankh ke sanduqche mein band hai ek sail-e-dard
dar rahi hun qufl un palkon ke wa karte hue

jaanti thi kab bhatakti hi rahegi dar-ba-dar
ham-safar apna sahabon ko ghata karte hue

dost ko pahchanti thin aankhen na dushman koi
phod dala hai unhen apni saza karte hue