ye zad-e-rah hamesha safar mein rakh lena
bichhde waqt ka manzar nazar mein rakh lena

mile to ras bhi aae lakir hathon ki
ye ek kamal bhi dast-e-hunar mein rakh lena

safar hai laut ke aana agar nasib na ho
saja ke yaad meri chashm-e-tar mein rakh lena

hamari zad mein hai puri tarah fasil-e-shab
hamara nam numud-e-sahar mein rakh lena

kisi ki yaad ki khushbu safar mein sath chale
kisi ke hijr ka mausam nazar mein rakh lena