ye zauq pech-o-tab ka ye raqs mauj-e-ab ka
ajib rang hai hamare dil ke iztirab ka

ye zindagi ye be-kanar ranj-o-gham ki dastan
ye zindagi khayal hai jawaniyon ke khwab ka

meri guzarishat ke jawab mein ye khamushi
mujhe guman na tha is intiha-e-ijtinab ka

teri nigah hai ki kaif-e-taza ka payam hai
teri nigah hai ki daur hai sharab-e-nab ka

wo mere ranj-o-gham ne ham-nafas talash kar liya
wo phika pad gaya hai rang ru-e-mahtab ka

gharib 'fitrat' aaj-kal khamosh-o-girya-kosh hai
kabhi to rang dekh us ke dida-e-pur-ab ka