zabt ke ba-wasf dil kyon be-adab hone laga
kyon nigahon se ayan rang-e-talab hone laga

kya hui meri wafaon ki aqidat kya hui
bewafai ka gila kyon zer-e-lab hone laga

be-qarari dil ki fitrat zabt-e-gham meri sarisht
kashmakash ka taza saman roz-o-shab hone laga

dil ki khushnudi agar manzur hai khamosh rah
josh-e-gham to aaj-kal kuchh be-adab hone laga

'fitrat' aur be-mehri-e-taqdir ka shikwa ghalat
ye nahin hone ka ai dil aisa kab hone laga