yun bhatakna dar-ba-dar achchha nahin lagta mujhe
bin tumhaare ye safar achchha nahin lagta mujhe

pyar ke is khel mein anjam sab ka ek hai
tutna dil ka magar achchha nahin lagta mujhe

aasra allah ka kafi hai insan ke liye
hath phaila kar bashar achchha nahin lagta mujhe

main bura hun ye bhala apni ana mein mast hun
kyun udhar jaun jidhar achchha nahin lagta mujhe

aane wali nasl ke haq mein duaen kijiye
phul se chehron pe dar achchha nahin lagta mujhe

hoti hai bachchon se raunaq har dar-o-diwar ki
bin parindon ke shajar achchha nahin lagta mujhe

jin gharon mein ho nahin shamil dua man-bap ki
koi bhi ghar ho wo ghar achchha nahin lagta mujhe