yun har ek dard ka sauda to nahin ho sakta
main tere shahr mein ruswa to nahin ho sakta

mere bas mein to na tha zakhm pe marham rakhna
har koi shakhs masiha to nahin ho sakta

main tere dard ko mahsus to kar sakta hun
main tere gham ka mudawa to nahin ho sakta

raat be-chand munawwar to nahin ho sakti
ghar mein be-shama ujala to nahin ho sakta

hadisa ye hai ki patthar nahin insan hun main
dil mera lala-e-sahra to nahin ho sakta

tum bhi manoge ki har baat ki had hoti hai
roz yun wada-e-farda to nahin ho sakta