yun to ehsas-e-ziyan pe khun-e-dil rota raha zindagi ka bojh phir bhi dosto dhota raha intiha-e-gham mein bhi mauj-e-tabassum lab pe thi dard ki barish mein bhi ye dil dhanak hota raha barha is baat ka mujh ko hua hai tajraba jis ke haq mein ki dua kante wahi bota raha dil ke darwaze pe koi bhi sada ubhri nahin pyar-dastak ke liye main umr-bhar rota raha us ka ghar bhi shoalon ki zad se na aakhir bach saka jo laga kar aag khud tha chain se sota raha gham nahin 'akhtar' ko barbaadi ka apni ai khuda han magar sab kuchh tere hote hue hota raha